TALIDHAY SA TING-ULAN

Ang panahon sa kwaresma
Maoy akong kapungtan
Kay bation kog kainit sa lawas
Singot way puas
Sa akong panit manggawas.

Apan kon panahon
Gani sa ting-ulan
Ako mokiat, motalidhay
Maglipay buntagay
Bahala nag masuko
Mga silingan kong hingatulgon.

Hinuon, kinahanglan kong magbantay
Kay dunay mga tawo
Nagtinguha kanako pagpatay.
Lamian kuno kog karne kay sa manok.
Aw, tan-awon lang nato
Kon kinsang mga mata ang mosulikat
Human makatilaw sa akong unod.
Wala sila masayod nga makahilo kong dako.

American Frog ko do!


(First published in Sun.StarCebu Weekend, June 8, 2003)